當我陀B嘅時候, 我都有d少病, 正所謂少病是福。之不過, 食西藥, 又驚有副作用對BB唔好, 但食中藥又怕藥材唔乾淨唔適合…所以病親都係冇咩藥o岩食! 但係Touchwood, 我陀B O個陣算係好少病, 病親都係瞓足一日就正常返~睇醫生, 都係為求醫生俾張假紙我, 唔返工係咁瞓, 望住D藥煉一煉仙。
其實由陀B, 到而家餵人奶, 講真嘅, 我一粒藥都未食過。就算個頭好痛, 我都死忍爛忍…點知
最近, 和牛爸又病左…好唔好彩, 明明背住和牛爸嚟瞓覺、又冇親熱, 都被佢傳染左…真係勁灰! 仲要撞正元旦呢個短假期, 有得霸住和牛B嘅日子先黎病, 激死呀!
我忍左咁耐有病都唔食藥, 唯獨是今次喉嚨痛, 我真係有睇醫生食西藥嘅念頭。咁好啦, 於是我踏大步咁去睇醫生, 睇完。由於要照顧悠悠B嘅關係, 我包藥都係放低左, 唔得閒食。好喇…到我可以坐低食藥, 我先拎D藥出黎再望一次, 嗯! 等我講一次我今次咩病先: 我有喉嚨痛、有鼻水、有輕微咳。
醫生知我餵人奶, 所以開左以下嘅藥俾我:
1. 止痛藥一包 注明：「需要時服」 (我喉嚨又未痛到就黎死, 我諗唔需要食)
2. 收鼻水藥一包 (食左會令人昏迷嘅藥, 我要照顧和牛B, 咁仲食唔食好? 定係和牛B你自己照顧自己啦, 媽咪瞓先)
3. 咳藥水一支 (我其實2個鐘先可能咳一次, 唔食啦)
4. 喉糖 (傳說中勁難食嘅o個D味)
老老實實, 我心目中, 喉嚨痛應該要有一包消炎藥, 但既然冇嘅話。我就綜合左我個人觀點後, 我最終都係擺低左包藥…又繼續煉仙!
由於, 和牛爸係超級病魔, 所以佢放棄瞓大床嘅權利。所以和牛B就填補左呢個床位, 方便我照顧之餘, 又可以溫韾一下! 但留意, 因為我都病, 和牛B都有少少傷風, 但我唔想一己私慾令佢嘅病加劇, 所以我有少少變態…我係戴住口罩黎瞓覺~唔知有冇人好似我咁? 個口咁臭焗住成晚~唔焗暈自己都偷笑~
但係, 我煉仙左一日, 我靠不停飲水, 我竟然好返晒!!! 但係超級病魔和牛爸病情就有點反覆…唉! 老公, 你快D好返啦! 我同和牛B下半世都要靠你養架…天父, 請您快D賜和牛爸一個強壯嘅Body啦!
有時候, 陀住BB, 又驚對BB唔好, 生完餵人奶, 又驚食左西藥對D奶唔好, 影響BB。你話喇, 做媽媽有時都幾慘, 乜都要驚住就住。但係又咁講嘅, 真係好病就要食藥, 只係我個人條頸比較硬, 所以先至成日煉仙。
點都好, 祝天下間嘅準媽媽、餵母乳嘅媽媽, 身體健康!!
備註: 其實大肚婆同餵人奶嘅媽媽係有藥食, 只不過藥力會較為輕微d ge~希望我嘅硬頸, 唔好為大家造成恐慌。
和牛B: 爸爸媽媽你地要快D好返, 等和牛B運功先~媽哩媽空, 病魔捐山窿
--------------------------------------------------
歡迎聯絡我&和牛B: chungying56@hotmail.com
Facebook專頁: 和牛B嘅成長專頁
--------------------------------------------------
留言列表
