【懷孕日記】初生BB購物清單－和牛B的成長日記

離和牛B預產期日子, 仲有77日。其實仲有d濕碎野未買齊, 好似抹Pat Pat嘅棉, 因為怕初初出世長期用濕紙巾, BB會敏感爛Pat Pat, 所以我會買嬰兒專用清潔棉, 大大塊, 又少少厚, 清潔起上黎應該冇咁易沾到便便用尿尿~

之前行吉豬島(@EON)俾錢時見到Cashier有張BB購物檢查咭, 所以拎左張黎做參考~都幾多架wo, 不過, 睇清楚d其實唔係全部都要買架。要視乎返自己嘅需要嘅~

影左張相俾大家睇, 不過相信都睇得唔清楚架啦~

所以我打一次出黎俾大家參考下~諗下有咩係需要而又溜左未買嘅~

清潔及衛生用品	數量	家居及戶外用品	數量	初生嬰兒用品	數量	衣服用品	數量
面盆、浴盆連浴網	1套	嬰兒床、音樂吊傘	1套	奶樽8、9安士	6個	和尚袍(全棉)	6件
毛巾、面巾	2套	床品套裝	1套	奶樽4安士	2個	長袍/兩用袍	4件
爽身粉、粉盒	1套	隔尿墊	1套	消毒奶煲	1個	外套	2件
洗頭水、沐浴露	1套	監視器、收聽器	1套	消毒清潔液	1支	手套、腳套	2套
棉花棒、棉花球	1套	蚊帳、防蚊器	1套	奶樽鉗	1個	包被	2件
髮刷、鼻孔清潔器	1套	BB車、雨蓬	1套	清潔奶樽刷及奶咀刷	1套	帽子、襪子	2套
消毒棉	1包	學行車、學便廁	1套	安心假奶咀	2個
濕紙巾	1盒	餐椅、加高椅	1套	奶粉格	1個
潤膚用品	1支	汽車座椅	1個	探熱器、耳溫計	1個
尿片	2包	揹帶、手帕	1套

其實上面有部分, 之前好勤力聽講座、填入會form都已經儲左好多Sample~所以唔駛買~慳返唔少~

最開心係, 尿片我都收集左pampers, haggies, moony etc.起碼4個牌子~真係試用, 可以睇下邊個牌子好用d~ 因為聽過有d 媽媽話"H"牌NB尿片...會溜屎...咁問返原因係, 太鬆...所以後面溜呀...不過要試左先知~可能瘦B唔o岩用"H"牌~

至於濕紙巾, 入Johnnyson個媽媽會, 佢地好豪會送一大包濕紙巾做迎新禮物俾你, 不過就要自己親身上去寫字樓到拎, 而且係辦公時間, 及指定時段~所以話, 著數嘅野, 係要付出嘅~

而紗巾仔, 手套仔呢d~其實又係...返醫院o個段路, 通常成日有d姨姨兜你填表入面, 又有迎新禮物, 所以又可以拎好多免費紗巾。自己可以買少dd紗巾仔~

至於BB床, 我就冇朋友唔要, 而我同老公又冇咩要求, 本錢亦唔多唔想煩所以去買新嘅~之前去@EON買, C-MAX千五蚊左右, 連埋床褥、床圍等床品都幾抵ga仲包送貨, 村屋送上樓都唔額外收費!!! 由於和牛B會有2頭住家, 所以床我都要買兩張...點知我買左一個星期之後, 我媽媽話俾我知...UNI仲抵$900 BB床連床褥(係冇左床品je), 之後仲有$100coupon送返...咁其實張床連床褥只需$800

所以話...真係要格下價先得...