懷孕初期o個時同老公商量+拗左好耐
…到底係我返出去娘家坐月定係要我媽媽山長水遠入黎照顧我呢? 重點係我會去QE生, 娘家在九龍, 嫁左之後就搬左屯門, 但係我就誓死堅持唔會去屯門醫院生嘅~
所以一路傾左好耐最後其實就係決定左返出去娘家到坐月，咁坐月前當然都要諗定待產呢一PART架, o個時就諗住我臨放產假前早一兩日先出娘家等生。但係…突然間我好多變數…愛兔走左, 爸爸走左兩件事都令我哭崩。加上, BB29週就已經調左頭，政府同私家醫生都話, 如果我情緒正常冇咩特別大波動, 其實BB應該都會38, 39週就出世。
咁話說上星期, 我就問我老公, 如果…我突然間半夜話生得, 咁你點?
佢dead air左5秒, 之後話…咁咪同你去屯門醫院囉!! 之後我碌大對眼望住佢! 「咩屯門醫院, 你要即刻CALL的士, 送我去QE呀!」之後佢認真mode咁問「咁呢到打的去QE要幾耐?」 (好老實我未試過o係屯門打的去QE播, 於是答佢30-45分鐘呱)佢就話, 「唔得啦, 咁耐, 我驚你危險呀」之後我話…「有幾危險? 如果我30-45分鐘就生得, 我咪好幸福? 但係冇可能囉, 唔痛返幾十幾個鐘你咪使旨意甩難啦」
我非常之堅持
而我老公其實都幾驚青架~所以…佢最近同我講, 老婆不如你再早少少出娘家待產, 怕你突然間o係屯門生, 真係去QE太遠啦。所以我今晚就會執齊行李+入院用嘅走佬袋返娘家。老公話好唔慣, 咁我都好唔慣, 但我話佢好正囉, 一個人獨霸咁大間屋!!我返去都係行張床瞓架咋~因為嫁左之後, 間房俾埋我家姐同姐夫用。我寄人離下架~~~不過, 都開心嘅, 同屋企人一齊住就算瞓張臨時行出黎嘅床都一樣開心啦, 因為我屋企本身兄弟姊妹多, 所以好熱鬧。加上最近我爸爸過左身…我更加想陪多D屋企人, 而我自己最擔心都會係…自己見到爸爸冇返屋企…會諗起就唔開心je。不過相信OK, 我會帶齊我D離家出走百寶~手工藝工具去打發時間, 不過…唔知和牛B俾我hea幾耐呢? 可能我一放產假佢就要出世奴役我都唔出奇
始終我都預料唔到, 和牛B嘅出世, 相信我屋企人都會好開心同埋有返一個寄託。唔好再為爸爸過身而太傷心…亦相信我爸爸會保佑我地, 喺第二個世界睇住和牛B成長。
以前去旅行執gip好輕易，而家…大住個肚黎執真係好吃力。但又唔想嗌老公執, 因為如果佢參與我執gip過程, 一定會煩死我架!! 所以就係呢個原因, 我幾辛苦都係自己執!!
返娘家待產+坐月足足都應該會有個幾月, 可以要執多幾套衫、褲替換先得嘅~
但係當我執嘅時候…其實好多野想拎想帶…原來走佬/離家出走係好困難GA?!!
仲有好多和牛B嘅濕碎野, 奶樽呀, 奶樽刷, 奶樽夾呀, 同埋D衫仔, 紗巾。好在之前和牛B嘅沖涼用毛巾, 一早同媽媽買完, 媽媽就拎左返娘家。
建設方面, 娘家已經買多左張BB床同埋床品(床品係家姐送~仲要係Peter Rabbit~好開心), 不過應該就未砌嘅, 我覺得我生完佢地先砌都未遲。
入院用走佬袋:
俾大家參考下, 唔知我有冇執溜到, 如果有, 大家記得提下我呀!!
產婦M巾兩大包, 洗潔瓶, 乳墊, 透氣網褲, 出院著的衫、褲、外套, 餵奶胸圍, 洗頭噴霧, 牙刷, 牙膏, 杯, 毛巾, 拖鞋
**張相有D冇show出黎架~
終於36週了，對腳好攰好攰好攰...我都終於有種捧西瓜嘅感覺...
Enjoy最後嘅孕期~
--------------------------------------------------
歡迎聯絡我&和牛B: chungying56@hotmail.com
Facebook專頁: 和牛B嘅成長專頁
--------------------------------------------------
留言列表
