濕疹真係一個非常普遍 & 令人感到討厭嘅皮膚問題, 一來BB會紅敏痕癢, 嚴重甚至乎會破損, 出水。二來媽媽見到BB咁係好心痛嘅!和牛B就飽受呢個問題一段時間, 和牛B滿月之後, 兩邊臉頰就開始出現粒粒, 我以為係暗瘡之類嘅野, 就嘗試用人奶搽, 拖延左大約一個星期, 臉頰明顯紅左…之後雙手摺位o個到都開始紅出現一撻撻一粒粒細細粒嘅野。見到咁, 於是我就帶左和牛BB去睇普通科嘅西醫。醫生話係濕疹, 於是開左類固醇俾和牛BB, 話試下搽幾日先, 早晚一次, 另外用下金銀花抹都冇得。咁試左2日已經有好轉, 我就停藥膏了。
點不知, 唔夠一星期又翻發…如是者…繼續發…婆婆煲左金銀花水抹面, 不過我覺得每一次抹完, o個D位都會紅左! 所以, 我其實冇再用黎抹, 但傳統上真係好多人話金銀花係work…
病情一直都係Keep住, 搽下藥膏好左就停…後來, 就試下睇中醫, 因為唔想搽咁多類固醇。咁中醫話BB咁細唔會俾藥佢食, 就執左幾劑野生金銀菊用黎敷面, 抹身。不過試過…好似仲衰, D皮膚明顯仲乾左, D藥材仲染到BB塊面黃金金, 所以又停左…
同期, 好HIT嘅莞茜水, 我其實都試過, 不過似乎唔work。
再轉左睇第二個普通科醫生, 呢個係我由細睇到大嘅老醫生。佢話其實BB濕疹好普遍, BB會有呢個情況係因為身體免疫系統未完成發育。又係開左類固醇藥膏俾我搽, 嗌我放心啦, 薄薄地咁搽。仲有就係沖涼唔好搽野啦, 用水啦, 水唔好咁熱, 仲要唔好沖咁耐, 沖得耐反而皮膚仲乾! 同埋要加強保濕! 另外, 老醫生仲話唔好亂用莞茜水、金銀菊, 因為每個人體質不同, 如果有敏感反應可以好嚴重。
而家和牛BB就快5個月大, 經過一輪長期戰後, 皮膚終於靚番了~
對付濕疹, 我而家有以下呢D方法
1) 長衫長褲 - 手同腳有濕疹, 都係著返長衫長褲, 以免皮膚再不停磨擦, 令到傷口破損, 拖延復原時間。 (婆婆教路)
2) 勤用保濕Cream – Cream真係要自己試, 因為有D人話呢隻好, O個隻好。我就認為最緊要d cream夠杰身, 厚敷, 每一次換片時順便搽埋! 我有用自製嘅母乳Cream, 成份更加天然~所以更加好~
3) 臉仔濕疹 – 盡量保持乾爽, 如果BB玩口水, 玩到一面都係要盡快抹
4) 餵母乳盡量清淡一D, 我就因為咁戒左海鮮, 豆漿、牛肉同蛋我盡量食少左
5) 縮短沖涼時間 – 手快手腳咁用溫水沖
6) 抱BB最好著一件乾淨& cotton嘅衫, 以免BB臉仔磨擦時整傷
7) 溫度控制 – 盡量唔好熱&焗, 所以夏天一定開冷氣
呢隻手仔係一路好嚴重嘅範圍, 影呢張相嘅時候, 情況已經唔係咁嚴重! 最嚴重o個時係出晒水…係爛肉黎…不過我真係唔想post 出黎…睇到好唔開心好心痛…
呢張相係敷梗中藥 – 野生金銀菊嘅相。
同受濕疹困擾嘅BB, 希望快D好返!! 而媽媽要努力加油! 一定可以打贏濕疹架!!
--------------------------------------------------
歡迎聯絡我&和牛B: chungying56@hotmail.com
Facebook專頁: 和牛B嘅成長專頁
--------------------------------------------------
留言列表
