甜蜜分享：一家三口。皮婚Leather Wedding 7.12－和牛B的成長日記

2012年12月7日, 我同和牛爸於親朋戚友面前宣誓, 「我請在場各人見證，我(新娘姓名)願以你(新郎姓名)為我合法丈夫/妻子。」轉眼間咁就3年。我地兩公婆成日話, 「下! 咁就迫住同你一齊挨左3年拿…好慘囉~~」

回想起2012年, 老公同我求婚o個晚, 係補祝情人節, 我仲好記得係2月16日。天寒地凍…和牛爸帶我山長水遠入去馬灣, 一見到面佢就送左一束花俾我! 佢係第一次送花俾我!! 拍左拖4年, 足足4年! 我老公都冇送過花俾我, 乾花, 假花, , 花冧都冇收過就連摺紙嘅花都冇! 所以, 佢好唔浪漫..唔識情趣架。但屬於浪漫&搞驚喜派嘅我, 其實已經估到d野(冷醒)…跟住又見佢成手摸下個褸袋, 周身唔自然咁, 一定有古怪! 唔通咁細ge衫袋, 有幾廿萬?!! WAHAHAHA

我記得o個晚堅係冷浪漫, 坐o係馬灣近沙灘o個邊嘅一間德國餐廳, 直情沙灘上面開台呀, 咁凍食風呀…最差嘅係d野食唔好味好平靜咁食到尾聲, 佢去完廁所返黎! 就無啦啦o係褸袋拎個盒出黎, 打開有隻鑽石戒指(大唔大粒係其次)我O個刻個腦一片空白!! 個腦不停諗, 唔係呀嘛?!! 搞乜野呀…玩呢D?! 咁突然??? 佢就講好basic嘅, 你嫁俾我好唔好, 我呆左好多秒「我好煩架WO」佢話「我唔介意」我再話「我真係好麻煩架wo!」就係咁就求婚成功啦~ 「阿媽, 我得左啦~」

轉眼結婚三年了, 今年好特別, 因為多左悠悠B一齊, 一家三口~

上年我陀住和牛B一如以往都係去左馬灣近沙灘嘅餐廳食西餐~

今年見天氣凍又話會落雨, 所以唔去馬灣咁浪漫啦~轉去荃灣Outback食西餐~

今次呢一餐, 先知道原來Outback有呢D貼心服務~就係玩具服務~本來都唔知, 就係我地嗌waitress幫我地影返張合照, 佢嗌極和牛B都唔望鏡頭, 於是waitress姐姐就去拎法寶~玩具呀~~影完相, waitress姐姐仲擺低俾和牛B玩~最窩心係, 玩具底部有吸盤~可以吸實張台, 等BB坐定定玩~唔好嘈住大人開餐~下次帶住BB出街, BB坐唔定, 都可以同waiter/ waitress借玩具啦~~