話咁快, 悠悠B已經過左100日。之前有一篇Blog提到, 我其實唔會考慮擺滿月嘅原因:BB太細, 頸仔仲未夠硬, 軟淋淋, 抵抗力弱, 怕人太多, 將BB不停轉手轉手轉手...會嚇親, 夜晚會喊餐飽。所以決定100日大先去食一餐飯。由於, 我同我先生唔係咩富裕人家, 所以我地只係約左雙方嘅父母, 兄弟姊妹, 簡簡單單食一餐飯就算啦。
場地: 稻香集團 – 荃灣廣場稻坊
經過我嘅百日宴comparison之下, 我同老公最後決定揀稻香集團, 因為價錢最均宜, 食物質素唔差, Location又多, 由於男家住屯門, 女家住黃大仙, 所以我地揀左個中間點, 就係荃灣。咁o岩荃灣廣場嘅稻坊仲要係新裝修, 多左d廳房, 我只係Book左一圍佢都有一間房仔俾我, 仲可以麻雀耍樂, 非常之好!!
而呢一圍酒席仲要包汽水、橙汁任飲, 更奉送紅雞蛋同酸薑。
百日宴comparison : BB成長日記 - 百日宴資料
100日蛋糕: 美心
蛋糕方面, 我都想靚靚地, 又食得落口, 價錢中等嘅~而家坊間好多都係糖皮蛋糕, 靚就真係幾靚, 但係好睇唔好食…而且細細個都好貴, 如果想影相出黎大大方方, 咁就真係要付出多少少錢啦, 所以我睇左好多間, 終極我揀左美心呢一個蛋糕, 起初我都以為係糖皮, 收到貨先知~原來係藍色嘅cream!! 一開個盒仲聞到好香好甜嘅棉花糖味~好好味 Yummy!! 呢個蛋糕唔好話小朋友睇見開心同鍾意, 我自己都勁鍾意。呢個蛋糕最少要訂2磅, $416, 用HSBC/ 恒生Enjoy Card仲有得折! 所以完全符合我要求, 見得人, 又食得落口!
https://www.maximscakes.com.hk/tc/item_detail.asp?cid=1029&chid=FC058
場地佈置: NIL
因為我覺得只係食一餐飯~而且只係屋企人, 所以我放棄左呢一Part, 反正悠悠B根本都唔知我地班大人做梗乜, 咁倒不如將呢D錢留起佢, 第時俾悠悠用或者到悠悠懂事o個時, 搞生日會先拎返出黎仲好啦~要用得其所嘛~
主角服飾 – 頭飾 & 服飾
頭飾方面, 當然就係去左偉大祖國嘅淘寶網到淘返黎啦~呢個網好多唔同款嘅BB頭飾, 最後我都係決定左揀呢個閃閃皇冠款。唔會太誇張, 平時都可以用得返, 不過唔好處係…D金粉會甩..甩到悠悠B個頭都係, 仲閃左2日~HAHA
韓國兒童皇冠發飾嬰兒發帶寶寶頭花立體蕾絲珍珠皇冠女童公主頭飾 RMB4.89 (HKD5.9)
服飾方面, 件花花衫係o係悠悠B未出世嘅時候, 悠悠嘅姨媽媽o係Cath Kidston到買黎送俾悠悠B嘅。因為悠悠B手嘅濕疹都勁…好反覆, 所以著件長袖遮一遮, 儘量避免佢隻手再被其他菌接觸到, 始終o個晚一定個個爭住抱, 所以一定要著長袖了!
攝影: NIL
都係一樣, 因為只係自己兩家人食餐飯, 唔洗咁豪請專業攝影師嘅。都係大家拎出手機影呀影啦~~但無奈嘅係…我老公同埋我一家人影嘅全家幅…因為老爺唔識用iPhone, 以為影左, 但原來係冇…所以冇左lu…下次嗌人影相都真係要影完望一望啦~~
--------------------------------------------------
歡迎聯絡我&和牛B: chungying56@hotmail.com
Facebook專頁: 和牛B嘅成長專頁