其實我都幾怕換屎片, 所以好多時我知道我老公好樂意換, 我都會將呢個「重任」交托俾和牛爸負責。加上, 經歷過無數次爆屎爆到衫褲都係之後, 我就更加怕換屎片…臭味我都忍受得到。但係, 摸屎我真係有D怕o個個感覺!
點知…
有一日, 得我自己同和牛B一個o係屋企。和牛B…竟然爆到上肚臍!! 當時我抱起悠悠B都未察覺得到, 只係聞到有味。一放低…見到肚仔同褲仔都有!! OMG!!
但係, 我仲好大膽, 竟然仲即刻除褲仔同打開件衫…
有色有味馬上呈現我面前!!
O個刻我真係方寸大亂, 個腦一片空白…
同時間, 和牛B又繼續手舞足蹈…我完全唔知顧住和牛B對手定係清潔好…繼續空白!! 我最怕就係和牛B手仔摸到便便之後…食手指!! OMG!! 件衫到底點樣除出黎好?! 向上定反下?! 和牛B你可唔可以唔好郁?!!
個情況好惡劣…因為便便去到肚臍窿都有…真係好恐怖!! 我…抹下…又要捉下佢隻手…點知平時預先濕左嘅清潔棉又用晒!! 濕紙巾呢?! 濕紙巾你去左邊?!! 
呆左…救命…「點算好? 點算好?!」
想打電話俾和牛爸求救…但係…我唔可以行開…行開和牛B可能會食到屎手…
繼續瘋狂….
幾秒間, 又諗定係直接開盤水?! 定係點?!! 一個人得一對手, 和牛B又唔識坐, 就算識坐, 坐邊? 因為成個下身都係便便…攬埋身?! 咁我咪一齊做屎撈人?! 點算點算!!
最後, 我都係抱住和牛B衝左入廁所, 單手咁嗱嗱聲開左盤暖水, 放和牛B坐低o係水入面用水洗走左D便便先…再抹乾身…著返條片, 處理好之後, 再教一次水, 幫和牛B進行徹底清潔!! 
經過一輪混亂同慌忙失措後, 我手又震, 腳都軟埋…完全無晒力…虛脫左。
o個刻, 我係完全進入瘋狂狀態, 表情極度慌張同驚恐…但和牛B竟然仲對住我好天真好純真咁笑…我真係好無言!!
唔知大家遇到咁, 會點呢? 我承應, 我不夠冷靜!! 如果o係屋企都咁…出到街先黎爆屎爆獲金, 又得自己, 我應該點算?! 尿尿我試過…但容易處理好多…變左屎撈人呢下…真係…O晒咀…
--------------------------------------------------
歡迎聯絡我&和牛B: chungying56@hotmail.com
Facebook專頁: 和牛B嘅成長專頁
--------------------------------------------------
留言列表
