一個在職媽媽, 最期待就係放假。剛剛9月尾時, 我霸左左打工仔最期待嘅超筍正到爆連假假期, 只係請左3日大假就可以連放9日長假期。爽到爆!!
全職媽媽到底係點樣過嘅呢? 由於, 我係同老公一齊放, 所以我可以好肯定, 我絕對比真正嘅全職媽媽梳乎。
因為我嘅工作都係埋身餵奶, 陪BB瞓, 玩, 抱, 出下街…至於家務, 老公…唔該晒~~
呢段唔長唔短嘅假期入面, 最開心嘅體驗就係, 同和牛B一齊去左廸士尼同埋海洋公園。其實, 本身都唔打算o係和牛B咁細個嘅時候去, 一來貴, 二來怕和牛B辛苦, 三來, 和牛B去完都冇記憶~四來, 冇野o岩和牛B玩。不過真係好好彩, 因為呢兩個主題樂園, 都係有免費飛o係手, 所以我地先膽粗粗帶住和牛B去。
廸士尼黑色世界優先體驗場, 我地一家三口3點半就泊車等入場了。入到樂園…真係嘩一聲~一黎好曬…二黎最緊要做嘅同公仔影相, 我地都冇做到…因為真係O晒咀..好多人…條蛇餅好長…又熱又曬…怕和牛B熱親, 所以放棄了~
不停地鼠入有冷氣嘅地方~~而我嘅Target就係去小小世界, 坐船仔聽歌仔~和牛B上左船仔, 聽到歌仔, 佢個樣好好奇~~左右兩邊望~真係好得意~冇扭計~又冇郁黎郁去, 好乖咁坐o係爸爸大脾到望~話咁快, 就聽完「聯合國」世界真細小, 之後就轉戰四圍行, 拎住pass好著數~因為有3個區係只限持有pass嘅遊客進入~就係Toys Story o個個區~入到去已經冇乜人, 其實呢個區, 係其中一個會有「鬼」嘅地方~不過, 太陽都未落山, 所以未有鬼出現~不過和牛B已經跌晒wat, 疲態盡現, 所以我地都係急急腳搵返育嬰室。
廸士尼樂園育嬰室 – 以一個主題樂園黎講, 對於育兒設施我覺得唔太足夠。換片設施, 就每個女廁都會有。但育嬰室只有一個, 就係o係小鎮大街o個到, 近餐廳嘅。入面有職員招呼, 有2間房仔, 有2張搖椅, 仲有好舒服嘅冷氣~~我餵奶都差D餵到瞓著左~
當我餵完奶, 已經黃昏就天黑了, 夜間巡遊都差唔多開始。不過, 唔想和牛B攰得濟, 所以都係趕緊離開, 表演都唔睇了…
3小時嘅樂園參觀時間完畢。
總結, 其實唔係有免費飛+我任性, 真係唔打算去呢...因為又曬又熱, 全程我都不停用濕毛巾幫和牛B抹面, 抹手抹腳降溫。幸好, 和牛B都冇咁因為熱病左。
--------------------------------------------------
歡迎聯絡我&和牛B: chungying56@hotmail.com
Facebook專頁: 和牛B嘅成長專頁
--------------------------------------------------
留言列表
